正月初一就上工，爹娘看见想心痛。

寮内没粮住不着，没奈走出做长工。

做到二月人犁田，爹娘看见心头癫。

财主田园统耕了，自家未种一蔸箐。

三月做到清明前，谷种落泥满田青。

几多农活做尽了，东家又讲长年懒。

做到四月人播田，长年人仔做无闲。

左手捉秧右手播，布落田中满洋青。

做到五月莲开花，东家叫我去种瓜。

垅头种转垅尾落，手酸脚软眼睛花。

做到六月摞草时，手掏耙仔骨还痹。

几多禾草都摞尽，东家来看不满意。

做到七月天又旱，田里禾苗晒成干。

没好冬年天无水，做田人仔想心酸。

做到八月中秋前，长年这时正休闲。

心想回家探父母，东家又讲酒没做。

做到九月夜来长，东家杀鸡做重阳。

大细男女统食饱，鸡汤一口我没尝。

做到十月是立冬，立冬过后满洋空。

东家米谷有千万，长年人仔手空空。

十一月正是落雪时，长年人仔身没衫。

东家给你算工钱，三除四剔无钱你。

十二月时节是年边，爹娘等我转做年。

郎今空手转寮去，爹娘看见叫连天。